Самарқанд вилояти Самарқанд шаҳар Бош имом-хатиблиги w w w . s a v a d - u l - a z a m . u z

Қуръон оятлари

Ислом бегона аёлларга қарашни ҳаром қилди!

 
 

Эркакларнинг номаҳрам аёлларга қараши тақиқланганинг сабаби доимо ҳаммани қизиқтириб келган. Хўш, нега Ислом бу ёмон одатни ҳаром қилди? Қуйида қисқача жавоб беришга ҳаракат қиламиз.

Эркак кишининг бегона аёлга атайлаб қарашини Ислом ҳаром қилган. Набий соллаллоҳу алайҳи васалламнинг Али розияллоҳу анҳуга айтган гапларини эслайлик: «Эй Али! Назарни назарга эргаштирма! Биринчи кўз тушиши зарарингга бўлмаслиги мумкин, аммо кейингиси, албатта, сенинг зараринггадир». Шундай экан, бегона аёлга такрор қараш эркак кишининг шаҳватини уйғотади, қарши жинс вакилига нисбатан турли ўй-хаёлларни олиб келади. Ислом эса мўминни Аллоҳ ҳаром қилган ҳар қандай нарсадан ҳимоя қилишга қаттиқ ҳаракат қилади. Унутмайликки, бегона аёлга назар ташлаш Расулуллоҳ соллаллоҳу алайҳи васаллам айтганларидек, «назар иблиснинг заҳарланган ўқларидан биридир».

Набий соллаллоҳу алайҳи васалламнинг таълимотлари бандани ҳар қандай шубҳага, хатога тушиб қолиш эҳтимолидан ҳимоялайди. Аллоҳ белгилаб берган чегараларни босиб ўтмасликка чорлайди. Қанчадан-қанча муаммоларнинг ва касалликларнинг ечими кўзни номаҳрамдан тийишга, фаржни сақлашга боғлиқ эканини ҳаётимиз давомида кўрамиз.

Сўзим охирида ҳар бир мусулмонга Аллоҳ таолонинг қуйидаги сўзини ҳар куни бир неча марта ўқишни тавсия этаман:

قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ۚ ذَٰلِكَ أَزْكَىٰ لَهُمْ ۗ إِنَّ اللَّهَ خَبِيرٌ بِمَا يَصْنَعُونَ

“Сен мўминларга айт, кўзларини тийсинлар ва фаржларини сақласинлар. Ана шу улар учун покдир. Албатта, Аллоҳ нима ҳунар қилаётганларидан хабардордир” (Нур сураси, 30 оят).

"Savad-ul-azam.uz" матбуот хизмати


Киритилган вақти: 17/03/2021 15:01;   Кўрилганлиги: 86
 
Материал манзили: https://savad-ul-azam.uz/islam/ayahs/islom-begona-ayollarga-qarashni-harom-qildi
Чоп этилган вақт: 23/10/2021 10:41